Mizoram Sawrkar Cooperation Department buatsaihin ni 27th April, 2022 chawhma dar 11 khan Van Dhan Vikas Kendra Cluster (VDVKC) 11 te hnenah Prime Minister Van Dhan Yojana (PMVDY) kaltlangin hnathawhna tur hmanraw hrang hrangte sem chhuah a ni. Hmanruate inhlan zawh hnu hian a hman dan leh enkawl zui kawnga tul angte inhrilhhriatna hun mithiamten an nei chhunzawm a ni.
He hun puala program tawi DCO Champhai Pisa tuala buatsaih hi Pu S.Lalremngheta, DCO Champhai chuan a kaihruai a. PM Van Dhan Yojana kaltlanga society-te tana hnathawhna tur hmanruate sem chhuah a ni chu lawmawm tiin, a hlawhtlin theih nana thahnemngai taka thawktute fakawm a tih thu a sawi a. Sawmna ngaipawimawha hun pawimawh tak hmangtute lawmna thu sawiin, society member-te chu hmanrua an dawnte a nih dan tur ang taka hmanga sawrkar hmalakna leh beiseinate ti puitlingtu nih tum turin a fuih a. Intodelh nana hmang turin duhsakna a hlan nghal bawk a ni.
Thusawitu dang Pu C.Vanlalhruaia, CAO Champhai & Nodal Officer, PMVDY chuan Van Dhan Yojana hnuaiah inzirtirna training leh hmanruate semchhuahna hun hman thin a nih thu a tarlang a. Scheme bultan nan kum 2020 ah Champhai District-ah society 2 thlan a ni a, hlawhtling taka scheme kalpui niin nikum March thla khan endik a ni a, sawrkar pawh a lawm hle a ni, a ti a. One District, One Crop hnuaiah thlai bikah Champhai chu vaimim ching tura thlan a nih thu pawh sawiin, hmanrua sem chu thlai sawngbawl kawngah tangkai taka hman a nih ngei a beisei thu a sawi a. Society-te chu sawrkar laipuiin tih takzeta hnathawk tura a duh thu pawh sawiin, hnathawhna hmanruate sem chhuah a nih hma hauha theihtawp chhuaha hmala an awm chu chhuanawm a tih thu a sawi bawk.
Pu Lalmuanpuia, CAO, Champhaiin hmanruate hlanna hun a hmanga a. Van Dhan Yojana chu India ramah kum 2018 ah bultan a nih thu leh Mizoramah chuan kum 2020 ah kalpui tan a nih thu a sawi a. Society-te chu tualchhung mamawh phuhruk mai piah lamah thawnchhuah tham siam chhuah tum turin a fuih a ni.
Vawiin hian hamthatna dawngtu Society 11; Champhai District atangin 6 leh Khawzawl District atangin 5 te hnenah Van Dhan Yojana Second phase kaltlangin hmanraw hrang hrang- Vaimin, hmarcha, aieng leh sawhthing herna khawl, a nuaina khawl, phorona khawl te, khuai khawi mite tan a hmanrua chi hrang hrang, thingpui chingtute hmanrua leh siamna atana tangkai khawlte sem chhuah a ni a. Tihian Undivided Champhai District-a VDVKC 15 te tan a thawhkhatna atan hmanrua sem zawh a ni.
Champhai District-ah hian kum 2020 atang khan Van Dhan Mission hi kalpui tanpui niin a hlawhtlina hmel pawh hmuh chhoh mek zel a ni a. Mi thahnem takin an dinhmun chawikan nan an hmang chho mek a, vaimim bakah hmunphiah, khuaizu, handloom, hmarcha,thingpui te hi he mission hnuaia Undivided Champhai District-a hmalakna langsar zual deuhte an ni. November ni 16-30, 2021 a New Delhi a TRIFED buaisaih National Tribal Festival 'Aadi Mahotsav' ah Champhai District a mi Leisenzo VDVKC te chuan Van Dhan hnuaia an thil siam chhuah thingpuife pholanna an nei a, hei bakah hian March ni 8, 2022 khan Champhai Bethel VDVKC leader Pi Laldinngheti chu TRIFED in Van Dhan Mission hlawhtlin nana a thawh hlawk em avangin Women Achiever ah an rawn thlang tawh bawk a ni.
Prime Minister Van Dhan Yojana hi India rama tribal mite hmasawnna tur atana scheme pawimawh tak Ministry of Tribal Affairs kaltlanga April ni 14, 2018 a bultan a ni a. Tribal Cooperative Marketing Development Federation of India (TRIFED) chu kutke pawimawh taka hmang chungin State Sawrkar nen tangrualin PMVDY hi kalpui a ni. Van Dhan Mission tum bulpui ber chu tribal te'n an chhehvela ramngaw hausakna hmang tangkaia intunnun nana an hman theihna tura ruahmanna siam niin, awmze neia tribal mipuiten an chhehvela ramhnuaia thil thar chhuahte an mahni ngeiin an sawngbawla, a hralhna thlenga an kutken theihna tura sawrkar laipui scheme duan a ni.
Written by: Dr. Lallawmkima Thangluah, MIS, DIPRO - CHAMPHAI Dated: 27th April 2022, 4:42 PM
